«Benfika» va Norvegiya terma jamoasi qanot vingeri Andreas Skyelderup 18 yoshdan kichiklar ishtirok etgan pornografik videoni yuborgani uchun shartli ravishda 14 kun qamoq jazosiga mahkum qilindi, deb xabar beradi VG.

Avvalroq ma’lum bo‘lishicha, norvegiyalik 19 yoshida bo‘lganida do‘stlariga 18 yoshdan kichiklar ishtirok etgan pornografik videoni yuborgan. O‘sha vaqtda u Daniyaning «Nordshelland» jamoasida o‘ynagan.

Futbolchiga Daniya qonunchiligi 235-moddasi bo‘yicha ayblov qo‘yilgan: bu modda 18 yoshdan kichik shaxslar tasvirlangan ochiq jinsiy xarakterdagi foto yoki videolarni saqlash yoki tarqatishga nisbatan qo‘llaniladi.

Manbaga ko‘ra, Kopengagen sudida prokuror futbolchining qamoqda jazo o‘tashini talab qilgan, ya’ni shartli jazo emas, balki haqiqiy qamoq jazosi.

Oxirida sud shartli ravishda 14 kun qamoq jazosini tayinlagan. Andreasga bir yillik sinov muddati belgilanadi, ammo u jamoat ishlariga mahkum qilinmaydi.