Hindistonning Goa shahrida bo‘lib o‘tayotgan shaxmat bo‘yicha jahon kubogi musobaqasi o‘zining yakuniga yaqinlashib qoldi. Bugun esa yarim final bosqichi doirasida tay-brek bahslari bo‘lib o‘tdi.

Javohir Sindarov qora donalarda o‘ynaganiga qaramay, 15+10 formatida o‘tkazilgan ilk rapid bahsida Nodirbek Yoqubboyevni mag‘lub etdi. Hamyurtlarimiz o‘rtasidagi ikkinchi o‘yinda esa durang qayd etildi. Shu tariqa, Javohir Sindarov jahon kubogi finaliga chiqdi. Shu bilan birgalikda, o‘zbekistonlik grossmeyster Jahon toji uchun talabgorlar musobaqasini qo‘lga kiritdi.

Javohir jahon kubogi finalida xitoylik Vey Yiga qarshi dona suradi. Ushbu sportchi bugun rossiyalik Andrey Yesipenko ustidan g‘alaba qozondi. Birinchi partiyada durang qayd etilgach, ikkinchi o‘yinda Yesipenko ustunlikni qo‘lga kiritdi. Ammo 55 va 56-yurishda rossiyalik shaxmatchi qo‘pol xatolarga yo‘l qo‘yib, kutilmaganda, o‘z Ruxini raqibga berib qo‘ydi. Natijada Andrey mag‘lubiyatni tan oldi.

Jahon kubogi bronza medali uchun o‘zbekistonlik Nodirbek Yoqubboyev va rossiyalik Andrey Yesipenko o‘rtasidagi bahs bo‘lib o‘tadi.

Final va 3-o‘rin uchun o‘yinlar 24-26 noyabr kunlari o‘tkaziladi.