Angliyadagi «London Chess Classic» turnirida kecha 5-tur o‘yinlari o‘tkazildi. Unda ishtirok etayotgan o‘zbekistonlik grossmeyster Nodirbek Abdusattorov ketma-ket to‘rtinchi g‘alabani qo‘lga kiritdi.

Hamyurtimiz bu safar gresiyalik Nikolas Teodoruga qarshi oq donalarda o‘ynadi. O‘yin ancha dramatik kechdi va Nodirbek ustunlikni bir necha marta qo‘ldan chiqardi. Abdusattorov debyutdan ustunlik bilan chiqdi va raqibga bosimni oshirib bordi. Ammo 18-20-yurishlarga kelib vatandoshimiz pozision kichik xatolikka yo‘l qo‘ydi. Oqibatda vaziyat tenglashib qoldi.

26-yurishda esa Teodoru qo‘pol xatoga yo‘l qo‘ydi. U o‘z Farzinini Nodirbekka topshirib, evaziga Rux va Filni qo‘lga kiritdi. Natijada ustunlik yana Abdusattorov tomoniga o‘tdi va 35-yurishga kelib o‘zbek shaxmatchisi g‘alabaga juda yaqin keldi. Ammo vatandoshimiz aniq yurishni topa olmagani uchun (oldi ochiq a yo‘lakdagi piyodani oldinga surish kerak edi) 37 va 38-yurishlarda noaniq harakat orqali vaziyat yana tenglashib qoldi.

Nikolas bu paytga kelib seytnot holatiga tushib qolgani uchun bo‘lsa kerak, 39-yurishda yana qo‘pol xatoga yo‘l qo‘ydi. Bu safar Nodirbek ustunlikni qo‘lga kiritdi va 40-yurishda o‘z Farzinini qurbon qilib, piyodasini Farzinga chiqara oldi. 48-yurishda gresiyalik shaxmatchi mag‘lubiyatni tan oldi.

Ushbu g‘alabadan so‘ng Nodirbek 4,5 ochko bilan peshqadamlikni mustahkamladi. Ikkinchi o‘rindagi Alirizo Firuzja kecha durang o‘ynadi va o‘zbek sportchisidan 1,0 ochko ortda qolmoqda.

Nodirbek Abdusattorov bugun 6-tur doirasida Sem Shenklendga qarshi qora donalarda o‘ynaydi. O‘yin Toshkent vaqti bilan 21:00 da start oladi.