O‘zbekiston terma jamoasining sobiq himoyachisi Vitaliy Denisov 2026 yili bo‘lib o‘tadigan jahon chempionati qur’asi natijalaridan mamnun ekanligini bildirdi, deb xabar berdi Sovsport.ru nashri.

Jahon chempionati final bosqichiga ilk bor yo‘l olgan O‘zbekiston terma jamoasi K guruhida Portugaliya va Kolumbiyaga qarshi maydonga tushadi. Guruhdagi qolgan bir o‘rinni Kongo, Yangi Kaledoniya va Yamayka o‘rtasidagi bahs hal qiladi.

«Guruh juda jiddiy. Portugaliya haqida biror narsa deyish shart ham emas — hammasi ancha ravshan. Kolumbiya ham kuchli raqib, lekin jahon chempionatida boshqacha bo‘lishi mumkin emas. Menimcha, guruh ajoyib, qur’adan mamnunman.

Ronalduga qanday qarshi turish mumkin? Murabbiylar shtabi hammasini batafsil o‘rganib chiqadi, ortiqcha narsa o‘ylab topishmaydi. U yerda xavf faqat Ronaldudan kelmaydi. Joau Nevesh, Brunu Fernandesh, Vitinya — yuqori toifadagi futbolchilar juda ko‘p. Bizni juda qiziqarli o‘yin kutib turibdi. Bir tomondan, O‘zbekiston uchun birinchi jahon chempionatida maqsadlar uncha muhim emas degan fikrga qo‘shilaman. Boshqa tomondan esa, faqat ishtirok etishdan ko‘ra ko‘proq narsani istaysan. Eng kamida guruhdan chiqish kerak — buning o‘ziyoq yaxshi natija bo‘ladi.

Hozircha bizdan qancha mutaxassis va muxlis boradi, bilmayman, ammo AQSHda o‘zbek diasporasi juda katta, futbolchilarimizni qo‘llab-quvvatlovisiz qoldirishmaydi. O‘zimning borishim haqida hozircha bilmayman, chunki chipta topish qiyin bo‘ladi — faqat Portugaliya bilan o‘yinga emas, balki istalgan bahsga», — dedi Denisov.

Jahon chempionati AQSH, Kanada va Meksikada o‘tkaziladi. 48 ta jamoa ishtirok etadigan turnir 2026 yil 11 iyundan 19 iyulgacha davom etadi.