Ўзбекистон терма жамоасининг собиқ ҳимоячиси Виталий Денисов 2026 йили бўлиб ўтадиган жаҳон чемпионати қуръаси натижаларидан мамнун эканлигини билдирди, деб хабар берди Sovsport.ru нашри.

Жаҳон чемпионати финал босқичига илк бор йўл олган Ўзбекистон терма жамоаси K гуруҳида Португалия ва Колумбияга қарши майдонга тушади. Гуруҳдаги қолган бир ўринни Конго, Янги Каледония ва Ямайка ўртасидаги баҳс ҳал қилади.

«Гуруҳ жуда жиддий. Португалия ҳақида бирор нарса дейиш шарт ҳам эмас — ҳаммаси анча равшан. Колумбия ҳам кучли рақиб, лекин жаҳон чемпионатида бошқача бўлиши мумкин эмас. Менимча, гуруҳ ажойиб, қуръадан мамнунман.

Роналдуга қандай қарши туриш мумкин? Мураббийлар штаби ҳаммасини батафсил ўрганиб чиқади, ортиқча нарса ўйлаб топишмайди. У ерда хавф фақат Роналдудан келмайди. Жоау Невеш, Бруну Фернандеш, Витинья — юқори тоифадаги футболчилар жуда кўп. Бизни жуда қизиқарли ўйин кутиб турибди. Бир томондан, Ўзбекистон учун биринчи жаҳон чемпионатида мақсадлар унча муҳим эмас деган фикрга қўшиламан. Бошқа томондан эса, фақат иштирок этишдан кўра кўпроқ нарсани истайсан. Энг камида гуруҳдан чиқиш керак — бунинг ўзиёқ яхши натижа бўлади.

Ҳозирча биздан қанча мутахассис ва мухлис боради, билмайман, аммо АҚШда ўзбек диаспораси жуда катта, футболчиларимизни қўллаб-қувватловисиз қолдиришмайди. Ўзимнинг боришим ҳақида ҳозирча билмайман, чунки чипта топиш қийин бўлади — фақат Португалия билан ўйинга эмас, балки исталган баҳсга», — деди Денисов.

Жаҳон чемпионати АҚШ, Канада ва Мексикада ўтказилади. 48 та жамоа иштирок этадиган турнир 2026 йил 11 июндан 19 июлгача давом этади.