Londonning "Arsenal" klubi sobiq futbolchisi Pol Mersonning fikricha, Mikel Merino doimiy ravishda hujumchi pozisiyasida o‘ynamasligi kerak.
O‘tgan turda "kanonirlar" "Aston Villa"ga imkoniyatni boy berib qo‘ygandi (1:2). Mikel Arteta jamoasi hamon Premyer-ligada peshqadamlik qilmoqda, ammo "Manchester Siti" bilan farq endi u qadar katta emas - atigi ikki ochko, "Aston Villa" esa atigi uch ochkoga ortda qolmoqda.
"O‘ylashimcha, Arteta "Aston Villa"ga qarshi o‘yinda Merinodan hujumda foydalanishga qaror qilib, xato qilgan. Ha, u ko‘plab muhim gollar urdi, ammo raqib ajoyib formada edi - bunday o‘yinda Dyokereshga o‘xshagan futbolchi kerak edi.
Siz yangi hujumchi uchun katta pul to‘laysiz, keyin esa uni ketma-ket uchta o‘yinda zaxirada qoldirasiz. Sog‘-salomat bo‘lgan Dyokeresh nega o‘ynamayotganini tushunmayapman. Buni avval ham aytganman va yana bir bor aytaman: "Arsenal" hujumda Merino bilan o‘ynashda davom etsa, APLda g‘alaba qozona olmaydi," - deya Pol Mersonning so‘zlarini keltiradi Arsenal News Channel.
Shanba kuni London grandi o‘z maydonida "Vulverxempton"ni qabul qiladi.
