Ukraina futbol assosiasiyasi (UFA) 2026 yilda bo‘lib o‘tadigan jahon chempionati saralashining pley-off bosqichida o‘z terma jamoasi o‘yinlarini Ispaniyada o‘tkazishga qaror qildi.
Ukraina terma jamoasi Shvesiya bilan yarim finalni Ispaniyaning Valensiya shahrida, "Levante" klubining uy stadionida o‘tkazadi. Ushbu stadion 26 354 tomoshabinni sig‘dira oladi. Agar ukrainaliklar shvedlarni mag‘lub etsa, JCH-2026 yo‘llanmasi uchun hal qiluvchi bahsda Polsha - Albaniya uchrashuvi g‘olibini ham shu arenada qabul qiladi.
Avvalroq Ukraina terma jamoasi o‘z uy uchrashuvlarini Polshada o‘tkazgan edi. Mamlakatlar terma jamoalari pley-off yo‘lining finalida to‘qnash kelishi mumkinligi sababli, ukrainaliklar rasmiy ravishda uy uchrashuvini kafolatlangan mehmon uchrashuviga aylantirmaslik uchun boshqa mamlakatni tanladilar.
O‘yinlar 2026 yilning 26 va 31 mart kunlari bo‘lib o‘tadi. Ukraina terma jamoasi Yevropa saralashining D guruhida 10 ochko bilan ikkinchi o‘rinni egalladi.
