Tennis bo‘yicha “Katta dubulg‘a” turnirlarining to‘rt karra g‘olibi, ayollar o‘rtasida dunyoning birinchi raqamli raketkasi bo‘lgan belaruslik tennischi Arina Sobolenko WTA Player Awards yillik mukofoti doirasida yilning eng yaxshi ayol tennischisi deb e’tirof etildi. Bu Sobolenko uchun ushbu nominasiyadagi ketma-ket ikkinchi g‘alaba bo‘ldi.
2025 yilning eng yaxshi tennischisi unvoni uchun Sobolenko bilan quyidagi sportchilar ham kurash olib bordi:
Iga Shventek (Polsha);
Amanda Anisimova (AQSH);
Yelena Ribakina (Qozog‘iston);
Kori Gauff (AQSH);
Medison Kiz (AQSH).
Nominasiyalar g‘oliblari an’anaga ko‘ra tennis turnirlarini yoritib boruvchi xalqaro OAV vakillari tomonidan aniqlanadi.
2025 yil davomida Arina Sobolenko AQSH ochiq chempionati, shuningdek, Mayami (AQSH) va Madrid (Ispaniya) shaharlarida o‘tkazilgan “Masters 1000” musobaqalarida hamda Brisben (Avstraliya) shahridagi WTA 500 turnirida g‘alaba qozondi. Shuningdek, u Australian Open, Roland Garros va WTA Finals — mavsumning yakuniy turniri finallarida mag‘lub bo‘ldi.
Arina Sobolenko faoliyati davomida 27 ta WTA miqyosidagi turnirda g‘olib chiqqan bo‘lib, shundan 21 tasi yakkalik bahslariga to‘g‘ri keladi. Shuningdek, u 2017 yilda Belarus milliy terma jamoasi safida Federasiya kubogi (hozirgi Billie Jean King Cup) finalchisi bo‘lgan.
