"Monako" klubi ispaniyalik vinger Ansu Fatining ijara muddatini uzaytirmaslikka qaror qildi. Yosh futbolchi ijara muddati yakunlangach, katta ehtimol bilan "Barselona"ga qaytadi. Bunday qarorga kelishining asosiy sababi futbolchining doimiy jarohatlari bo‘lib, bu "Monako"ning uning xizmatlaridan voz kechishida asosiy omil bo‘ldi. Bu haqda BBC va The New York Times bilan ishlaydigan jurnalist Romen Molinaga tayanib, Dailysports xabar berdi.

Manbaga ko‘ra, Fatining "Monako"dagi taqdiri amalda hal bo‘lgan. Klub 23 yoshli ispaniyalik futbolchining jarohatlarga moyilligi va shartnomadagi yuqori talablarni inobatga olib, uni o‘z safida qoldirmaslikka qaror qildi.

Ansu Fati o‘tgan yozda "Monako"ga bir yil muddatga ijaraga berilgandi. Klubdagi faoliyati davomida u 14 ta o‘yinda maydonga tushib, 6 ta gol urgan. Biroq, shu yilning dekabr oyida u tizza osti payidan jarohat olgan va u hali ham tiklanmoqda. Uning maydonga qaytish muddati noma’lumligicha qolmoqda.