Afrika millatlar kubogi o‘yinlarida muxlislar stadionga bepul kirishi mumkin.

RFI xabar berishicha, turnir tashkilotchilari Afrika futbol konfederasiyasi bilan kelishgan holda, agar uchrashuv boshlanganidan taxminan 20 daqiqa o‘tgach tribunalar to‘lmagan bo‘lsa, muxlislarga stadionga bepul kirishga ruxsat bermoqda.

Jumladan, Kamerun va Gabon terma jamoalari o‘rtasidagi uchrashuv (1:0) deyarli bo‘sh tribunalar oldida boshlangan, biroq birinchi taym davomida, yomg‘irga qaramasdan, stadion sezilarli darajada to‘lib borgan.

Keyinchalik rasmiy tashrif buyuruvchilar soni e’lon qilindi — 45 mingdan ortiq o‘ringa ega arenada 35 200 tomoshabin bo‘lgan. Turnirning dastlabki kunlarida bunday manzaralar ko‘plab o‘yinlarda kuzatildi.

Rabot shahrida Kongo Demokratik Respublikasi va Benin o‘rtasidagi o‘yinda dastlab 6 703 nafar muxlis qatnashgani aytilgan, ammo keyinroq bu ko‘rsatkich 13 073 nafarga tuzatildi.

Chiptalari to‘liq sotilgan yagona uchrashuvlar mezbon jamoa — Marokash terma jamoasining Mali va Zambiyaga qarshi o‘yinlari, shuningdek, Jazoirning Burkina-Faso va Ekvatorial Gvineyaga qarshi bahslari bo‘ldi.