"Inter" bosh murabbiyi Kristian Kivu A Seriya 16-turidan o‘rin olgan "Lechche"ga (1:0) qarshi o‘yindan so‘ng o‘z fikrlari bilan o‘rtoqlashdi.

"Men qiyin bo‘lishini kutgandim, chunki "Napoli" bilan yakshanba kungi o‘yinda bo‘lgani kabi ko‘p energiya sarflab, to‘liq natijaga erisha olmaganingda, bu senga bosim o‘tkazadi. 72 soatdan keyin keyingi o‘yinga chiqish eng qiyin ishlardan biri bo‘lganini futbolchi sifatida eslayman.

Qiyinchiliklarga qaramay, jamoa to‘g‘ri kayfiyatda edi, oxirigacha ishondi va g‘alaba uchun kurashdi. Bunday o‘yinlarda yutishdan ko‘ra yutqazish ehtimoli ko‘proq. Yigitlar muvaffaqiyatga loyiq edilar, chunki ular natija uchun hamma narsani qilishdi.

Avvallari qishki chempion bo‘lganman, lekin buning ahamiyati yo‘q. May oyida cho‘qqida bo‘lish muhim. Biz raqobatbardoshmiz, ammo har bir ochko uchun kurash mavsum oxirigacha davom etadi", - deb hisoblaydi Kivu.

Turnir jadvalida "Inter" 2-pog‘onani bo‘lishib turgan "Milan" va "Napoli"ni 6 ochkoga ortda qoldirmoqda.