"Real" yarim himoyachisi va Marokash terma jamoasi futbolchisi Braim Dias Afrika millatlar kubogi finalida Senegalga qarshi o‘yinda (0:0, qo‘shimcha vaqtda 0:1) penaltidan xato qilganidan so‘ng ijtimoiy tarmoqlarda murojaat qoldirdi.
Ikkinchi bo‘limga qo‘shib berilgan 14-daqiqada Braim 11 metrli zarbani markazga panenka usulida yo‘lladi, biroq darvozabon Eduar Mendi to‘pni ushlab qoldi. Penaltidan oldin uni belgilash yuzasidan uzoq tortishuvlar bo‘lib o‘tgan, hatto Senegal terma jamoasi maydonni tark etgan edi.
"Yuragim og‘riyapti. Siz bergan mehr, har bir xabaringiz va qo‘llab-quvvatlashingiz tufayli bu sovrin haqida orzu qilgandim — bularning barchasi meni yolg‘iz emasligimni his qildirdi. Men butun yuragim bilan kurashdim.
Kecha men omadsizlikka uchradim va barcha javobgarlikni o‘z zimmamga olaman, samimiy uzr so‘rayman.
O‘zimga kelishim oson bo‘lmaydi, chunki bu yara osonlikcha bitmaydi. Lekin harakat qilaman. O‘zim uchun emas, balki menga ishonganlar va men bilan birga azob chekkanlar uchun.
Bir kuni olg‘a intilib, siz bergan mehrning barchasini qaytarishga va Marokash xalqimning faxriga aylanishga harakat qilaman", — deb yozdi Braim.
