"Liverpul"ning chap qanot himoyachisi Endryu Robertson "Tottenxem"ning transfer maqsadiga aylandi. London klubi allaqachon 31 yoshli futbolchining o‘zi bilan og‘zaki kelishuvga erishgan.

Jurnalist Pol Joysning ma’lumotiga ko‘ra, "shporlar" "qizillar"ga ehtimoliy bonuslarni hisobga olmaganda, Robertson uchun taxminan 3 mln funt (taxminan 3,5 mln yevro) to‘lashga tayyor. Eslatib o‘tamiz, futbolchining amaldagi shartnomasi yarim yildan so‘ng o‘z nihoyasiga yetadi.

Endryu Robertson 2017 yildan beri mersisaydliklar sharafini himoya qilib keladi. Transfermarkt portali ekspertlari tajribali lateralning narxini 12 mln yevroga baholamoqda. Joriy mavsumda shotlandiyalik futbolchi Arne Slot jamoasi safida 21 ta o‘yinda maydonga tushdi va 1 tadan gol hamda golli uzatmaga mualliflik qildi.