Toshkent shahri mezbonligida o‘tayotgan Osiyo Olimpiya kengashining 46-Bosh assambleyasida Osiyo Olimpiya kengashi prezidentligiga saylov tadbiri tashkil etildi.

Saylov jarayonida ishtirokchilar tomonidan bir ovozdan Milliy Olimpiya qo‘mitalari assosiasiyasi (ANOC) raisining birinchi o‘rinbosari, Qatar Olimpiya qo‘mitasi prezidenti Shayx Jav’an bin Hamad Ol Soniy nomzodi ma’qullandi.

OOKning 46-Bosh assambleyasi doirasida 2026-yilda Saudiya Arabistonining Riyod shahrida o‘tkazilishi rejalashtirilgan “Yopiq inshootlar va jangovar sport turlari bo‘yicha Osiyo o‘yinlari”ga tayyorgarlik masalalari yuzasidan hisobotlar tinglandi.

Bosh Assambleya tadbirlari davomida OOKning tegishli yo‘nalishlar bo‘yicha ijroiya qo‘mitalari rahbariyatlari o‘z faoliyati va rejalari yuzasidan ma’ruzalar bilan ishtirok etdi.

Xususan, Maslahat qo‘mitasi raisi Ser Miang, Sportchilar qo‘mitasi raisi Ning Ding, Madaniyat qo‘mitasi raisi Battushig Batbold hamda Ta’lim qo‘mitasi raisi shahzoda Fahad Al Saud o‘z yo‘nalishlari bo‘yicha amalga oshirilgan ishlar va kelgusidagi ustuvor vazifalar haqida hisobotlarni Bosh Assambleya ishtirokchilariga taqdim etdi.

Hisobotlarda Osiyo o‘yinlarini yuqori saviyada tashkil etish, sportchilar manfaatlarini himoya qilish, madaniy va ta’limiy dasturlarni rivojlantirish masalalariga alohida e’tibor qaratildi.

Prezident Shavkat Mirziyoyev Osiyo Olimpiya kengashining 46-Bosh assambleyasida ishtirok etadi. Davlat rahbari tadbirda nutq so‘zlab, kengash va xalqaro sport tashkilotlari rahbariyati bilan uchrashuv o‘tkazishi ko‘zda tutilgan.