21 yoshli hujumkor yarim himoyachi Fer Lopes "Vulverxempton"ni tark etib, La Ligaga qaytdi. Bundan buyon u yana "Selta" safida to‘p tepadi, u joriy futbol mavsumi yakuniga qadar ijaraga o‘tdi.
Eslatib o‘tamiz, Lopes asli madridlik bo‘lsa-da, professional futboldagi faoliyatini aynan "Selta"da boshlagan va u yerda asosiy tarkib futbolchisiga aylangan. 2025 yilning yozida Lopes "Vulverxempton" futbolchisiga aylandi, "bo‘rilar" uni 23 million yevroga sotib olishdi.
Shunga qaramay, Angliyada APLning asosiy autsayderi sifatida Lopesning omadi kelmadi. Yosh futbolchi "bo‘rilar"ning ketgan yetakchilariga o‘rinbosar bo‘la olmadi va atigi 12 ta rasmiy o‘yinda maydonga tushib, bitta golli uzatmani amalga oshirdi.
"Selta" Primera joriy mavsumida yevrokuboklar yo‘llanmasi uchun kurash olib bormoqda. Galisiyaliklar yettinchi o‘rinda va 32 ochkoga ega.
