"Aston Villa" matbuot xizmati "Beshiktosh" hujumchisi Temmi Abraxam transferini e’lon qildi.
28 yoshli futbolchining transfer summasi va shartnomasi haqida ma’lumot berilmagan. Hujumchi 2018-2019 yillarda ham "Aston Villa" sharafini himoya qilgan. O‘shanda u "sherlar" safida "Chelsi"dan ijara asosida o‘ynagan.
Temmi Abraxam mavsumning birinchi yarmida ijara asosida "Beshiktosh"da o‘ynadi. Yanvar oyida turk klubi hujumchi huquqini "Roma"dan 13 million yevroga sotib olgandi. Joriy mavsumda angliyalik futbolchi 26 ta o‘yinda maydonga tushib, 13 ta gol urdi va 3 ta golli uzatmani amalga oshirdi. Transfermarkt portali Abraxamni 14 million yevroga baholamoqda.
