«Tottenxem» bosh murabbiyi Tomas Frank «Manchester Siti»ga qarshi o‘yin oldidan muxlislar kayfiyati haqida fikr bildirdi.

«Shporlar»ning ayrim muxlislari jamoa «shaharliklar»ga yutqazsa ham qarshi emas, chunki bu orqali «Arsenal»ning uzoq yillardan beri ilk chempionlikni qo‘lga kiritishiga to‘sqinlik qilish mumkin. Jurnalistlar Frankdan shu masala yuzasidan izoh so‘rashdi.

«Bu qarama-qarshilik mohiyatini tushunaman, lekin ishonamanki, muxlislarimiz bu o‘yinda yaxshi natija ko‘rsatsak, xursand bo‘lishadi. «Manchester Siti»ni mag‘lub etish biz uchun juda muhim», — dedi yakshanba kuni bo‘ladigan bahs oldidan daniyalik murabbiy.

Ayni paytda «Siti» «Arsenal»dan to‘rt ochko orqada qolmoqda. «Tottenxem» esa Premyer-liga jadvalida 14-o‘rinda bormoqda.