«Тоттенхэм» бош мураббийи Томас Франк «Манчестер Сити»га қарши ўйин олдидан мухлислар кайфияти ҳақида фикр билдирди.

«Шпорлар»нинг айрим мухлислари жамоа «шаҳарликлар»га ютқазса ҳам қарши эмас, чунки бу орқали «Арсенал»нинг узоқ йиллардан бери илк чемпионликни қўлга киритишига тўсқинлик қилиш мумкин. Журналистлар Франкдан шу масала юзасидан изоҳ сўрашди.

«Бу қарама-қаршилик моҳиятини тушунаман, лекин ишонаманки, мухлисларимиз бу ўйинда яхши натижа кўрсатсак, хурсанд бўлишади. «Манчестер Сити»ни мағлуб этиш биз учун жуда муҳим», — деди якшанба куни бўладиган баҳс олдидан даниялик мураббий.

Айни пайтда «Сити» «Арсенал»дан тўрт очко орқада қолмоқда. «Тоттенхэм» эса Премьер-лига жадвалида 14-ўринда бормоқда.