Lionel Messi «Barselona» prezidentligi uchun bo‘lib o‘tadigan ovoz berish jarayonida nomzodlarning birontasini ham qo‘llab-quvvatlamaydi. Messi mart oyidagi saylovlardan o‘zini uzoq tutishi haqida Marca nashri o‘z sahifalarida ma’lum qildi.
Shu bilan birga, Messi kelajakda baribir «Barselona»ga qaysidir rolda qaytishga qat’iy qaror qilgani yana bir bor ta’kidlanmoqda.
Hozirda 38 yoshli Lionel bor e’tiborini «Inter Mayami»dagi ishtirokiga qaratgan. MLSning yangi mavsumi boshlanishiga oz vaqt qoldi. Eslatib o‘tamiz, o‘tgan kuzda Messi «Inter Mayami» bilan 2028 yil oxirigacha mo‘ljallangan yangi shartnoma imzolagan edi.
Leo Messi «Barselona»ni 2021 yilda tark etgan. O‘shanda kataloniyaliklar moliyaviy qiyinchiliklar sababli argentinalik yulduz bilan shartnomani uzaytira olishmagan edi.
