«Liverpul» bosh murabbiyi Arne Slot «Manchester Siti»ga qarshi o‘yinda Muhammad Salohga nisbatan ishlatilgan shubhali qoida buzilishi epizodida hakamning chiqargan qaroridan norozi bo‘ldi.

Ikkinchi bo‘limda «shaharliklar» himoyachisi Mark Gexi misrlik futbolchining jarima maydonchasiga yorib kirishini uning libosidan tortib qolish orqali to‘xtatib qoldi. Referi bu vaziyatga e’tibor qaratmadi, bu esa «qizillar» ustozining keskin e’tirozlariga sabab bo‘ldi.

"Agar alohida e’tiborga loyiq vaziyat bo‘lsa, bu Saloh darvozabon bilan yakkama-yakka chiqib ketishi mumkin bo‘lgan epizoddir. Oxirgi yetti-sakkiz yil ichida «Enfild»da bo‘lgan har bir kishi yaxshi biladiki, bu Saloh uchun amalda gol degani. Hakamlar yana bizning ziyonimizga qaror qabul qilishdi. Ular o‘z ishlarini bajarishlari kerak", — deya Slotning so‘zlarini keltirmoqda «The Touchline».

Uchrashuv «Liverpul»ning 1:2 hisobidagi mag‘lubiyati bilan yakunlandi.