Insayderlar 24 yoshli ingliz hujumchisi Meyson Grinvudga bo‘lgan qiziqishlar ortib borayotganini ta’kidlashmoqda. "Fichajes" nashrining xabariga ko‘ra, futbolchi uchun asosiy da’vogarlar qatorida "Liverpul" va "Tottenxem" klublari bor.

Hujumchi joriy mavsumni "Marsel" safida juda sermahsul o‘tkazmoqda. Grinvud jamoa tarkibida barcha musobaqalarda 31 ta o‘yinda maydonga tushib, 21 ta gol urdi va 8 ta golli uzatmani amalga oshirdi.

Manbalarning qayd etishicha, "Marsel" hujumchini 90 million yevro evaziga sotishga tayyor. Bunday holatda uning sobiq klubi "Manchester Yunayted" kelishuv summasining 50 foizini (taxminan 45 mln yevro) kompensasiya sifatida qo‘lga kiritadi. Eslatib o‘tamiz, Grinvud 2018 yildan 2022 yilgacha mankunianliklar sharafini himoya qilgan.