«Yuventus» himoyachisi Federiko Gatti shu yozda jamoani tark etishi mumkin.

«Tuttosport» nashrining xabariga ko‘ra, Turin klubi futbolchini sotish variantini ko‘rib chiqishga tayyor. Bunga asosiy sabab sifatida jamoa bosh murabbiyi Luchano Spalletti uni endilikda «daxlsiz» futbolchilar qatoriga qo‘shmayotgani ko‘rsatilmoqda.

Shuningdek, himoyachining yillik 3 million yevro (aniqrog‘i 3,1 mln yevro) miqdoridagi maoshi ham klub rahbariyatini o‘ylantirib qo‘ygan. «Yuventus» Gattining maydondagi o‘yini bunday yuqori maoshga to‘liq loyiq emas deb hisoblamoqda. Ma’lumot o‘rnida, Gatti 2025 yilning iyul oyida klub bilan shartnomasini uzaytirgan va maoshi sezilarli darajada oshirilgan edi.

Federiko Gatti 2022 yilda «Frozinone»dan «Yuventus»ga 9 million yevro evaziga o‘tgan. Uning «keksa sinyora» bilan amaldagi shartnomasi 2030 yilning 30 iyuniga qadar mo‘ljallangan. Joriy 2025/2026 yilgi mavsumda himoyachi barcha musobaqalarda 17 ta o‘yinda maydonga tushib, 2 ta gol urishga muvaffaq bo‘ldi. «Transfermarkt» portali futbolchining ayni damdagi bozor qiymatini 20 million yevroga baholamoqda.