«Pari Sen-Jermen» bosh murabbiyi Luis Enrike hujumchi Usmon Dembelening ko‘rsatayotgan o‘yinlari haqida o‘z fikrlarini bildirdi.

Mavsumning birinchi yarmini omadsiz o‘tkazgan «Oltin to‘p» sohibi o‘tgan yilning oxiridan boshlab yana ajoyib sermahsullik namoyish etmoqda: fransuz futbolchisi so‘nggi o‘nta o‘yinda yettita gol urdi va to‘rtta golli uzatmani amalga oshirdi.

"O‘tgan mavsumda ham, ikki yil oldin ham xuddi shunday bo‘lgan edi. Yaqin-orada siz menga uning beqarorligi haqida gapirayotgan edingiz, endi esa uning o‘yiniga qoyil qolmoqdasiz. Usmon — o‘zgarmas. U sog‘lom va yaxshi sport formasida bo‘lgan paytida hayratlanarli darajada kuchli. Biz shunchaki u namoyish etayotgan futboldan zavq olishimiz kerak", — dedi Enrike matbuot anjumanida.