Madridning «Atletiko» klubi bosh murabbiyi Diyego Simeone La Liga 24-turidan o‘rin olgan «Rayo Valyekano»ga qarshi bahsdagi mag‘lubiyatga (0:3) munosabat bildirdi.
Simeone jamoa darvozaboni Yan Oblakning «chempionatdagi kurash tugadi» degan fikrlariga javob qaytardi.
«Men uning fikriga qo‘shilmayman. Futbolchilar qo‘llaridan kelgan barcha ishni qilishdi, biroq raqib yaxshiroq harakat qildi. Yigitlarni tanqid qilishga asos yo‘q. Endi chorshanba kungi o‘yinga e’tibor qaratishimiz kerak», — deya Simeonening so‘zlaridan iqtibos keltiradi Marca.
Mavsumning qolgan qismidagi maqsadlar haqida gapirar ekan, Simeone o‘z shogirdlari har bir bahsda xuddi so‘nggi o‘yindagidek maydonga tushishlari lozimligini ta’kidladi.
18 fevral kuni «Atletiko» Madrid Chempionlar ligasi pley-off bosqichi doirasida safarda Belgiyaning «Bryugge» jamoasi bilan to‘qnash keladi.
