"Bavariya" yarim himoyachisi Leon Goreska "Bayer" qiziqishlari doirasiga tushdi. "Dorishunoslar" 31 yoshli futbolchida maydon markazining yangi yetakchisini ko‘rishmoqda – ilgari Granit Jaka shunday rolni bajargan edi. Leverkuzenliklar allaqachon Goreskaning vakillariga murojaat qilishdi va futbolchi bu imkoniyatni keskin rad etmadi, biroq u Angliya Premyer-ligasiga o‘tish variantini afzal ko‘rmoqda, deb xabar bermoqda "Sport Bild". Qishda Londonning "Tottenxem" va "Arsenal" klublari futbolchiga qiziqish bildirgan edi.

Eslatib o‘tamiz, Leon Goreska joriy mavsum yakunidan so‘ng erkin agentga aylanadi – muddati tugayotgan shartnoma uzaytirilmaydi. Xavbek 2018 yildan beri "Bavariya" sharafini himoya qilib kelmoqda.