"Manchester Siti" darvozaboni Janluiji Donnarumma jamoadagi o‘zidan avvalgi posbon Ederson haqida fikr bildirdi.

Italiyalik futbolchi joriy mavsum boshida braziliyalik darvozabonning o‘rniga sotib olingan edi. Ederson esa Xosep Gvardiola jamoasidagi sakkiz yillik faoliyatidan so‘ng Turkiyaning "Fenerbaxche" klubiga ko‘chib o‘tdi.

"Men Ederson bilan aloqada bo‘lib turibman. U menga omad tiladi va men undan bunday xabar olganimdan juda xursand bo‘ldim. Jamoaning sobiq darvozaboni sizni qo‘llab-quvvatlashi doimo yoqimli. Biz tez-tez gaplashib turamiz, munosabatlarimiz yaxshi.

Ederson "Manchester Siti" uchun juda muhim edi. Menimcha, biz u bilan butunlay boshqachamiz. U oyoq bilan juda yaxshi o‘ynaydi. Men ham bu borada yomon emasman, lekin uning o‘yinida bu sifat asosiy o‘rin tutardi", — deya Donnarummaning so‘zlarini "City Report" keltirmoqda.

21 fevral kuni "Manchester Siti" Premyer-liga doirasida "Nyukasl" bilan to‘qnash keladi.