Vyetnamda jahon sport tarixidagi eng katta loyihalardan biriga start berildi. Yahoo Sports nashrining xabar berishicha, poytaxt Xanoy yaqinida dunyoning eng yirik futbol arenasi bo‘lishi kutilayotgan “Trong Dong” stadionining qurilish ishlari rasman boshlandi.

Yangi arena 135 000 tomoshabinga mo‘ljallangan bo‘lib, u sig‘imi bo‘yicha hozirgi rekordchi — Shimoliy Koreyadagi “1 may” (114 ming) va Marokashda qurilishi davom etayotgan “Hassan II” (115 ming) stadionlarini ham ortda qoldiradi.

Byudjeti: Taxminan 36 milliard AQSH dollari (925 trillion dong).

Infratuzilmasi: Stadion zamonaviy yopiladigan tom konstruksiyasi va ko‘p funksiyali maydonga ega bo‘ladi.

Muddati: Qurilish ishlari 2028-yilda yakunlanishi rejalashtirilgan.

Stadion nomi va arxitekturasi Vyetnam milliy merosi hisoblangan qadimiy bronza barabanlariga (Trong Dong) ishora qiladi. Bu dizayn mamlakatning qadimiy sivilizasiyasi, kuchi va hamjamiyat ruhini ifodalaydi. Majmua 9 ming gektarlik ulkan sport va shaharsozlik loyihasining markaziy qismi bo‘ladi.

Ushbu ulkan inshoot Vyetnamning global sport xaritasidagi mavqeini mustahkamlashga xizmat qiladi. Rasmiylar kelajakda bu yerda nafaqat futbol bo‘yicha jahon turnirlari, balki eng yirik xalqaro konsertlar va madaniy tadbirlarni o‘tkazishni rejalashtirmoqda.