«Real Madrid» rahbariyati Tibo Kurtuaning o‘rnini bosa oladigan uzoq muddatli nomzodlarni ko‘rib chiqishni boshladi. Klub akademiyasining tarbiyalanuvchisi Fran Gonsales asosiy voris sifatida e’tirof etilmoqda.
20 yoshli darvozabon «Valdebebas»da katta ishonchga ega va uni Kurtuaning kelajakdagi o‘rinbosari deb hisoblashmoqda. Biroq Gonsalesga boshqa klublar tomonidan qiziqish kuchayib bormoqda.
Xususan, «Chelsi» uni kelajakdagi birinchi raqamli posboni sifatida ko‘rib, futbolchining vakillari bilan aloqaga chiqqan. Ispaniyada esa «Real Sosyedad», «Espanyol» va «Valensiya» vaziyatni kuzatmoqda. Endi «Real» yosh iste’dodni jamoada olib qolish yoki tajriba orttirishi uchun boshqa klubga ijaraga berish borasida bir qarorga kelishi kerak.
