Germaniya Bundesligasida 24-tur o‘yinlari bo‘lib o‘tdi. Dortmundning "Borussiya" jamoasi munosib qarshilik ko‘rsatganiga qaramay, Myunxenning "Bavariya" klubiga 2:3 hisobida imkoniyatni boy berdi.
Shu tariqa, ushbu o‘yingacha Yevropaning top-5 ligalarida davom etayotgan eng uzoq seriya — "Borussiya"ning chempionatdagi 16 o‘yinlik mag‘lubiyatsiz seriyasi to‘xtadi. Eng qizig‘i shundaki, bu seriya aynan "Bavariya"ga qarshi o‘yindan boshlangan edi — 7-turda myunxenliklar raqibni 2:1 hisobida mag‘lub etishgandi va o‘shandan beri "Borussiya" kecha oqshomgacha mag‘lubiyat nimaligini bilmay kelayotgan edi.
Bundesliganing navbatdagi turida "arilar" "Kyoln" mehmoni bo‘lishadi. Ushbu bahs 7 mart kuni bo‘lib o‘tadi.
