Italiya terma jamoasi bosh murabbiyi Jennaro Gattuzo Jahon chempionati saralashining muhim o‘tish o‘yinlari oldidan tarkib tanlashda muayyan qiyinchiliklarga duch kelmoqda va 33 yoshli Marko Verrattini milliy jamoaga qaytarish imkoniyatini ko‘rib chiqmoqda. Bu haqda Arena Napoli nashri xabar bermoqda.
Tarqalgan ma’lumotlarga ko‘ra, Gattuzo yarim himoyachi bilan shaxsan suhbatlashgan va ularning muloqoti ijobiy ruhda o‘tgan. Anchadan beri terma jamoada o‘ynamagan va ayni damda Qatarning "Al-Arabiy" klubida to‘p surayotgan futbolchi qaytishga hamda jamoaga yordam berishga tayyorligini bildirgan. Joriy mavsumdagi 15 ta o‘yinda u 1 ta gol urdi va 4 bor assistentlik qildi.
Italiya terma jamoasi pley-off yarim finalida 26 mart kuni Shimoliy Irlandiya bilan to‘qnash keladi. Ushbu juftlik g‘olibi 31 mart kuni hal qiluvchi bahsda Uels yoki Bosniya va Gersegovina jamoasiga qarshi maydonga tushadi.
