"Manchester Yunayted"ning mashhur sobiq himoyachisi Rio Ferdinand Angliya Premyer-ligasidagi chempionlik poygasi haqida o‘z fikrini bildirdi.

"Qizil iblislar" afsonasining fikricha, bu safar titul "Arsenal"ga nasib etadi.

"Menimcha, "Arsenal" nima qilib bo‘lsa ham, qanday yo‘l bilan bo‘lmasin chempionlikni qo‘lga kiritadi. Ular sovrinlarni yutib, o‘zlariga bo‘lgan ishonchni mustahkamlab olishgach, butunlay boshqa jamoaga aylanishadi va keyingi mavsumda ularga qarshi o‘ynash yanada qiyinlashadi. Men "Arsenal"ning bunday yondashuvini to‘liq qo‘llab-quvvatlayman. Hali ham klub amalga oshirgan ishlari uchun katta hurmatga loyiq deb hisoblayman", – dedi Ferdinand Rio Ferdinand Presents podkastida.

"To‘pchilar" 29 ta o‘yindan so‘ng 64 ochko to‘plagan holda jadvalda peshqadamlik qilmoqda va bitta zaxira o‘yiniga ega bo‘lgan "Manchester Siti"dan besh ochko oldinda bormoqda.