Ispaniyaning “Real Madrid” klubi “Manchester Siti” yarim himoyachisi Rodri va “Borussiya Dortmund” himoyachisi Niko Shlotterbek transferi uchun 100 million yevro ajratishni rejalashtirmoqda. Bu haqda Mundo Deportivo nashri xabar berdi.

Manbaning ma’lumotiga ko‘ra, ushbu ikki futbolchini transfer qilish uchun 100 million yevro yetarli bo‘lmasligi mumkin. Ta’kidlanishicha, “qirollik klubi” yozgi transfer oynasida yangi futbolchilarni sotib olish-olmasligi ayrim o‘yinchilarning jamoani tark etishiga bog‘liq bo‘ladi.

Transfermarkt portali ma’lumotlariga ko‘ra, Rodrining bozor qiymati 75 million yevro, Niko Shlotterbekning transfer narxi esa 55 million yevroni tashkil etadi.

Joriy mavsumda Rodri barcha musobaqalar doirasida jami 24 ta uchrashuvda maydonga tushib, o‘z hisobiga ikkita gol yozdirib qo‘ydi. Uning “Manchester Siti” bilan amaldagi shartnomasi 2027 yil yozigacha mo‘ljallangan.

Germaniyalik himoyachi esa dortmundliklar safida 27 ta uchrashuvda maydonga tushib, 4 ta gol va 2 ta golli uzatmani amalga oshirgan. Uning shartnoma muddati ham 2027 yilga qadar amal qiladi.

La Liganing 27 ta turidan so‘ng “qaymoqranglilar” 63 ochko bilan turnir jadvalida ikkinchi o‘rinda bormoqda. “Selta” esa 40 ochko bilan oltinchi pog‘onani band etgan. Peshqadam “Barselona” hisobida esa 26 ta uchrashuvdan so‘ng jamg‘arilgan 64 ochko mavjud.