"Manchester Yunayted" Markus Reshfordning "Barselona"ga va Rasmus Xyoylundning "Napoli"ga yakuniy sotuvidan kamida 80 mln yevro ishlab olishni rejalashtirmoqda. Avvalroq, Xyoylundning 2026 yil 30 iyunda yakuniga yetadigan ijara muddatidan keyingi transferi masalasi hal bo‘lgani haqida xabar berilgan edi – "Napoli" mankunianliklarga 44 mln yevro to‘laydi.
Shu tariqa, Fabrisio Romanoning xabar berishicha, "qizil iblislar" bozor qiymati 45 mln yevro bo‘lgan Reshford uchun "Barselona"dan kamida 36 mln yevro kutishmoqda. Reshford 2025 yil 23 iyulda Kataloniyaga yo‘l olgan edi va o‘shandan beri "Barselona" safida 38 ta o‘yin o‘tkazib, 10 ta gol urdi hamda 13 ta golli uzatmani amalga oshirdi.
Xyoylund hisobida esa "Napoli" tarkibidagi 35 ta o‘yin, 13 ta gol va to‘rtta golli uzatma mavjud.













