"Bavariya" bosh murabbiyi Vensan Kompani o‘z jamoasining Chempionlar Ligasidagi potensial raqiblari o‘rtasidagi to‘qnashuv haqida o‘z fikrlarini bildirdi.
Myunxenliklar Bergamoda "Atalanta"ni tor-mor etishdi (6:1) va 1/4 final yo‘llanmasini deyarli naqd qilib qo‘yishdi. Germaniya grandining keyingi raqibi "Real" va "Manchester Siti" qarama-qarshiligi g‘olibi bo‘ladi. Ushbu juftlikda ham dastlabki uchrashuvdan so‘ng vaziyat ancha oydinlashgan – "qaymoqranglilar" o‘z uylarida 3:0 hisobida g‘alaba qozonishgan.
"Men o‘yinni farzandlarim bilan birga tomosha qildim, lekin ular barcha gollarni ko‘rishni istashdi, shuning uchun o‘sha oqshomdagi boshqa uchrashuvlarni ham kuzatdik. Hozircha chorak final haqida o‘ylayotganim yo‘q. "Atalanta" ustidan yana bir ishonchli g‘alabani ko‘rishni istayman. Albatta, "Real" bilan ham, "Manchester Siti" bilan ham bizga oson bo‘lmaydi. Kim bilan o‘ynashimizdan qat’i nazar, muxlislarimizni ajoyib tomosha kutmoqda", – dedi Kompani matbuot anjumanida.
"Manchester Siti" va "Real" o‘rtasidagi javob uchrashuvi 17 mart kuni bo‘lib o‘tadi, "Bavariya" esa bir kun o‘tib "Atalanta"ni qabul qiladi.
