Xosep Gvardiola «Arsenal»ni Premyer-liga chempionligi uchun poyga hali yakunlanmaganidan ogohlantirdi. «Manchester Siti» bosh murabbiyi «kanonirlar» bilan oradagi farq 9 ochkogacha kengayganiga qaramay, o‘z jamoasiga ishonishda davom etmoqda. Eslatib o‘tamiz, «shaharliklar» «Vest Xem» bilan 1:1 hisobida durang o‘ynashdi.
«Titul uchun kurash tugagani yo‘q, chunki biz hali yutqazmadik. Biz davom etamiz. Bizda aql bovar qilmas jamoa va ajoyib ruhiyat bor. Bugun Madriddagi o‘yinda ko‘p kuch sarflaganimizga qaramay, maydonda jang qildik. Biz — aql bovar qilmas jamoamiz. Oxirigacha kurashishda davom etamiz», — dedi Gvardiola TNT Sportsga bergan intervyusida.
Aytib o‘tish joizki, «Manchester Siti» hisobida bitta zaxira o‘yini mavjud, bundan tashqari, «shaharliklar» aprel oyida «Arsenal»ni o‘z maydonlarida qabul qilishadi.
