Хосеп Гвардиола «Арсенал»ни Премьер-лига чемпионлиги учун пойга ҳали якунланмаганидан огоҳлантирди. «Манчестер Сити» бош мураббийи «канонирлар» билан орадаги фарқ 9 очкогача кенгайганига қарамай, ўз жамоасига ишонишда давом этмоқда. Эслатиб ўтамиз, «шаҳарликлар» «Вест Хэм» билан 1:1 ҳисобида дуранг ўйнашди.

«Титул учун кураш тугагани йўқ, чунки биз ҳали ютқазмадик. Биз давом этамиз. Бизда ақл бовар қилмас жамоа ва ажойиб руҳият бор. Бугун Мадриддаги ўйинда кўп куч сарфлаганимизга қарамай, майдонда жанг қилдик. Биз — ақл бовар қилмас жамоамиз. Охиригача курашишда давом этамиз», — деди Гвардиола TNT Sportsга берган интервьюсида.

Айтиб ўтиш жоизки, «Манчестер Сити» ҳисобида битта захира ўйини мавжуд, бундан ташқари, «шаҳарликлар» апрель ойида «Арсенал»ни ўз майдонларида қабул қилишади.