Yakshanba kuni «Barselona»ning yangi prezidentini saylash uchun ovoz berish jarayoni bo‘lib o‘tdi. G‘alaba Joan Laportaga nasib etdi — u Viktor Font bilan kechgan bahsda 66 foizdan ko‘proq ovoz to‘plashga muvaffaq bo‘ldi.
«Men Laportani bugungi saylovdagi ishonchli g‘alabasi bilan tabriklayman. Shuningdek, yig‘ilib, «Barselona» dunyodagi eng yaxshi klub ekanligini barchaga ko‘rsatib bergan 40 ming a’zomizga minnatdorchilik bildiraman», — deya BarcaTimes nashri Fontning so‘zlarini keltirdi.
Shuningdek, u raqibining muvaffaqiyatiga jamoaning Xans-Diter Flik qo‘l ostidagi sport natijalari va «Kamp Nou» stadioniga qaytishi ijobiy ta’sir qilganini qo‘shimcha qildi.
Joan Laporta Kataloniya grandi rahbari lavozimini 2031 yilga qadar egallab turadi. Eslatib o‘tamiz, u so‘nggi besh yil davomida ham klubni boshqarib kelayotgan edi.
