Якшанба куни «Барселона»нинг янги президентини сайлаш учун овоз бериш жараёни бўлиб ўтди. Ғалаба Жоан Лапортага насиб этди — у Виктор Фонт билан кечган баҳсда 66 фоиздан кўпроқ овоз тўплашга муваффақ бўлди.
«Мен Лапортани бугунги сайловдаги ишончли ғалабаси билан табриклайман. Шунингдек, йиғилиб, «Барселона» дунёдаги энг яхши клуб эканлигини барчага кўрсатиб берган 40 минг аъзомизга миннатдорчилик билдираман», — дея BarcaTimes нашри Фонтнинг сўзларини келтирди.
Шунингдек, у рақибининг муваффақиятига жамоанинг Ханс-Дитер Флик қўл остидаги спорт натижалари ва «Камп Ноу» стадионига қайтиши ижобий таъсир қилганини қўшимча қилди.
Жоан Лапорта Каталония гранди раҳбари лавозимини 2031 йилга қадар эгаллаб туради. Эслатиб ўтамиз, у сўнгги беш йил давомида ҳам клубни бошқариб келаётган эди.
