Himoyachi Ibraima Konate o‘tgan dam olish kunlari "Tottenxem"ga qarshi o‘yinda ishtirok etmagan edi. Fransiyalik futbolchi sonning orqa mushagidagi noqulaylikdan shikoyat qilgandi. Matbuot anjumanida "Liverpul" bosh murabbiyi Arne Slot Konatening holati haqida to‘xtalib o‘tdi.
"Konate to‘liq tayyor, u boshqa hech qanday noqulaylik his qilmayapti. Shunday ekan, u asosiy tarkibda maydonga tushishga va umid qilamanki, 90 daqiqa yoki kerak bo‘lsa, undan ko‘proq o‘ynashga tayyor", — dedi Slot matbuot anjumani davomida.
"Liverpul" chorshanba kuni Chempionlar Ligasi 1/8 finali javob uchrashuvi doirasida "Galatasaroy"ni qabul qiladi. Turkiyadagi birinchi o‘yinda Istanbulning "sherlari" minimal — 1:0 hisobida g‘alaba qozonishgan edi.













