«Manchester Siti» yarim himoyachisi Bernardu Silva Chempionlar ligasi 1/8 finali doirasida Madridning «Real» klubiga qarshi kechgan javob uchrashuvining birinchi bo‘limida maydondan chetlatildi.
Uchrashuv bosh hakami Kleman Tyurpen «shaharliklar» sardoriga to‘pni qo‘l bilan o‘ynagani uchun qizil kartochka ko‘rsatdi. Mehmonlar nafaqat maydonda ko‘pchilik bo‘lib qolishdi, balki penalti tepish huquqini ham qo‘lga kiritishdi — uni Vinisius Junior golga aylantirdi. Silva uchun ushbu chetlatish Chempionlar ligasidagi faoliyatida birinchisi, shuningdek, «Manchester Siti» safidagi umumiy ilk qizil kartochka bo‘ldi. Portugaliyalik futbolchi ingliz grandi libosida jami 448 ta uchrashuv o‘tkazgan edi.
Bernardu Silva 2017 yilda «Monako»dan o‘tganidan beri «shaharliklar» safida to‘p surib kelmoqda. Uning amaldagi shartnomasi shu yozda o‘z nihoyasiga yetadi.
