Myunxenning «Bavariya» klubi bosh murabbiyi Vensan Kompani Bundesliganing 27-turi doirasida Berlinning «Union» jamoasiga qarshi kechadigan bo‘lajak o‘yin haqida fikr bildirdi.

«Union»ning kuchli tomonlarini bilamiz. Bu joriy mavsumda ularga qarshi uchinchi uchrashuvimiz bo‘ladi. Hozir o‘z uyimizda o‘ynayapmiz, shuning uchun Berlindagidan ko‘ra boshqacharoq o‘yin ko‘rsatishni istaymiz. Ko‘ramiz, ular o‘z o‘yin uslublarini «Alyans Arena»da qanchalik samarali qo‘llay olishar ekan. Ularga qarshi o‘ynash qanchalik qiyinligini yaxshi bilamiz», — deya Kompanining so‘zlarini keltirmoqda klub rasmiy sayti.

Germaniya chempionatining 26 turidan so‘ng «Bavariya» 67 ochko bilan turnir jadvalida birinchi o‘rinni egallab turibdi. «Union» esa 31 ochko bilan to‘qqizinchi pog‘onadan joy olgan.