Dortmundning «Borussiya» klubi sport direktori lavozimida faoliyat yuritayotgan Lars Rikken markaziy himoyachi Emre Jan bilan shartnoma uzaytirilganiga izoh berdi.

Avvalroq germaniyalik xavbek 2027 yilning iyun oyigacha mo‘ljallangan yangi mehnat shartnomasini imzolagani haqida xabar berilgan edi.

Hozirda «Borussiya» sardori chap tizzasidagi xochsimon bog‘lamlari uzilishidan keyin davolanish kursini o‘tamoqda.

«U — yetakchi, o‘rnak bo‘la oladigan shaxs va doimo jamoani birinchi o‘ringa qo‘yadi. Uning og‘ir jarohatidan so‘ng darhol qo‘llab-quvvatlashda davom etishimizni va’da qilganimiz bejiz emas, chunki u biz uchun kalit futbolchi hisoblanadi», — deya Rikkenning so‘zlarini keltirmoqda «asalarilar» matbuot xizmati.

Joriy mavsumda 32 yoshli Jan 16 ta uchrashuvda ishtirok etib, o‘z hisobiga uchta gol yozdirib qo‘yishga muvaffaq bo‘ldi.