«Barselona» «Yuventus» qanot himoyachisi Andrea Kambyazoga qiziqish bildirmoqda. Bu haqda Sportitalia xabar bermoqda.
Manba bergan ma’lumotlarga ko‘ra, «ko‘k-anorranglilar» rahbariyati italiyalik futbolchini himoyaning har ikkala qanotida ham o‘ynay oladigan universal himoyachi sifatida ko‘rmoqda.
Qayd etilishicha, Turin klubi Kambyazoni 50 million yevrodan kamiga qo‘yib yubormoqchi emas. «Yuventus» bosh murabbiyi Luchano Spalletti o‘z shogirdining o‘yinidan juda mamnun.
Joriy mavsumda 26 yoshli himoyachi barcha musobaqalarda 39 ta o‘yinda ishtirok etib, 3 ta gol va 4 ta golli uzatmani amalga oshirdi. Uning «Yuventus» bilan amaldagi shartnomasi 2029 yilning yoziga qadar mo‘ljallangan.
