«Real» vingeri Vinisius «Atletiko» bosh murabbiyi Diyego Simeonega uning avvalgi so‘zlarini eslatib qo‘ydi.

22 mart kuni bo‘lib o‘tgan Madrid derbisida «Real» «Atletiko»ni mag‘lub etdi (3:2). Ushbu bahsda Vinisius dubl qayd etdi va 87-daqiqada zaxiraga olindi. Maydonni tark etayotib, braziliyalik futbolchi «Atletiko» murabbiyining yonidan o‘tdi va to‘rt marta: «Meni haydab yuborishadi», deb aytdi. Bu holat Simeonega yoqmadi.

Vinisiusning bu so‘zlari jamoalarning yanvar oyida Ispaniya Superkubogi doirasidagi uchrashuviga ishoradir (o‘shanda «Real» 2:1 hisobida g‘alaba qozongandi). O‘sha o‘yin davomida Simeone Vinisiusga qarata: «Peres seni haydab yuboradi, mening gapimni eslab qol», degan edi.