Niderlandiyalik sobiq futbolchi Robin van Persi «Manchester Siti» yulduzi Erling Xolandni Premyer-liga tarixidagi eng yaxshi beshta hujumchidan biri deb hisoblamaydi.
Norvegiyalik futbolchi «shaharliklar» safiga o‘tganidan keyingi dastlabki uch mavsumning ikkitasida Angliya chempionati to‘purariga aylandi. So‘nggi oylarda samaradorligi biroz pasayganiga qaramay, u joriy mavsumdagi to‘purarlar ro‘yxatida ham peshqadamlik qilmoqda.
«To‘g‘risini aytsam, men Xolandni APL tarixidagi eng yaxshi besh nafar hujumchi qatoriga kiritmagan bo‘lardim. U «Manchester Siti» safida ishtirok etgan yettita finalning birortasida gol ura olmadi, lekin uni elita darajasidagi o‘yinchi deb atashda davom etishmoqda. Uning gollarining salmoqli qismi mahorat bobida ancha past bo‘lgan raqiblarga qarshi o‘yinlarga to‘g‘ri keladi. Bundan tashqari, u jamoaviy o‘yinda u qadar yaxshi emas», — deya hozirda «Feyenoord»da murabbiy bo‘lib ishlayotgan van Persining so‘zlarini keltiradi ingliz OAVlari.
Yaqinda Erling Xoland «Siti» tarkibida Liga Kubogi sohibiga aylandi.
