«Barselona» darvozaboni Joan Garsiya jamoa hujumchisi Lamin Yamal haqida o‘z fikrlari bilan o‘rtoqlashdi.

«Bu shunchaki aql bovar qilmas darajada. U bor-yo‘g‘i 18 yoshda. Uning qilayotgan ishlarini men o‘sha yoshda qilgan ishlarim bilan aslo solishtirib bo‘lmaydi. U hayratlanarli darajada iqtidorli va biz uni qo‘llab-quvvatlashimiz, rivojlanishda davom etishiga yordam berishimiz kerak», — deya Garsiyaning so‘zlarini keltiradi Barça Universal.

Yamal — «Barselona» akademiyasi tarbiyalanuvchisi hisoblanadi. O‘tgan yili 18 yoshli futbolchi «Oltin to‘p» uchun ovoz berish jarayonida ikkinchi o‘rinni egallagan edi.

Joriy mavsumda Yamal barcha musobaqalarda 40 ta o‘yinda maydonga tushib, raqiblar darvozasini 21 bor ishg‘ol qildi va 15 ta golli uzatmani amalga oshirdi.