Bilbaoning «Atletik» klubi rahbariyati faol ravishda yangi bosh murabbiy izlamoqda. Avvalroq xabar berilganidek, Ispaniya klubining amaldagi ustozi Ernesto Valverde joriy mavsum yakunlanganidan keyin jamoani tark etmoqchi.
Sky Sport nashrining ma’lumotlariga ko‘ra, «Atletik» boshqaruvi uchun asosiy nomzod 43 yoshli germaniyalik mutaxassis Edin Terzich bo‘lib turibdi. U bilan allaqachon muzokaralar olib borilmoqda.
Terzichning so‘nggi ish joyi Dortmundning «Borussiya» klubi bo‘lgan va u jamoani 2024 yilning yozida tark etgan edi. O‘shandan beri germaniyalik murabbiy ishsiz yuribdi.
27 ta o‘yindan so‘ng «Atletik» 38 ochko bilan La Liga turnir jadvalida to‘qqizinchi o‘rinni egallab turibdi.
