«Barselona» jamoa bosh murabbiyi Xans-Diter Flik bilan yangi shartnoma masalasini muhokama qiladi.

Jurnalist Roxer Torelyo bergan ma’lumotlarga ko‘ra, germaniyalik mutaxassisning manfaatlarini himoya qiluvchi agent Pini Zaxavi ikki haftadan so‘ng «ko‘k-anorranglilar» bilan muzokara o‘tkazish uchun Barselonaga tashrif buyuradi. 61 yoshli murabbiyning kataloniyaliklar bilan amaldagi kelishuvi 2027 yilning o‘rtalariga qadar mo‘ljallangan.

Yaqinda «Barselona» prezidenti Joan Laporta Flik bilan shartnoma 2028 yilgacha uzaytirilgan deb hisoblash mumkinligini aytgan bo‘lsa-da, kelishuv hali rasman imzolanmagan. Murabbiyning yaqinlari esa ehtiyotkorlikni saqlab turishibdi — istiqboldagi hamkorlikning ayrim detallari hali kelishib olinishi kerak.