«Pari Sen-Jermen» bosh murabbiyi Luis Enrike kelayotgan yozda «Manchester Yunayted» postini egallamaydigan bo‘ldi.

Ispaniyalik mutaxassis «PSJ»dagi holatidan mamnun va klub bilan amaldagi shartnomani uzaytirish bo‘yicha «ijobiy» muzokaralar olib bormoqda, deb xabar beradi UtdReport. «Qizil iblislar» 55 yoshli mutaxassisni taklif qilishga qiziqish bildirgan edi, biroq yaqin kelajakda bu tayinlovning iloji yo‘qligiga deyarli iqror bo‘lishdi. Maykl Kerrikning o‘rnini egallashi mumkin bo‘lgan nomzodlar ro‘yxatidan yana bir top-murabbiyning chiqib ketishi, ingliz mutaxassisining mavsum yakunlanganidan keyin ham o‘z lavozimida qolish imkoniyatlarini oshiradi.

Eslatib o‘tamiz, Kerrik yanvar oyida Ruben Amorimning o‘rnini egallab, «MYU» vaqtinchalik bosh murabbiyi lavozimiga tayinlangan edi.