«Arsenal» hujumchisi Kay Xavers londonliklar safidagi kelajagi borasidagi savollarga javob berdi.

26 yoshli futbolchi turli mish-mishlarga qaramay, «kanonirlar» lagerini tark etish niyatida emasligini ta’kidladi.

«To‘g‘risini aytsam, bu haqda hech narsa eshitmadim va o‘qimadim. «Arsenal»da o‘zimni xuddi o‘z uyimdagidek his qilyapman va o‘ylaymanki, klub ham mendan mamnun. Bu mavsum oson kechmayapti, lekin men kelajagimni albatta «Arsenal»da ko‘ryapman», — dedi Xavers Germaniya terma jamoasining Shveysariyaga qarshi o‘yini oldidan o‘tkazilgan matbuot anjumanida.

Eslatib o‘tamiz, hujumchi mavsumning birinchi yarmini deyarli to‘liq jarohat tufayli o‘tkazib yuborgan edi. U Mikel Arteta jamoasi safida 14 ta o‘yinda maydonga tushib, 3 ta gol urdi va 2 ta golli uzatmani amalga oshirdi.